Փոքր ֆերմերային տնտեսությունների կենսապայմանների բարելավում՝ կարողությունների զարգացման և կայուն տնտեսական կառույցների ստեղծման միջոցով
Իրականացնող` Կանաչ արահետ ՀԿ և Հույսի նշան ՀԿ
Ֆինանսավորող՝ Գերմանիայի Դաշնային Հանրապետության (ԳԴՀ) տնտեսական համագործակցության և զարգացման նախարարություն
Գերմանական «Հույսի նշան» և գյուղատնտեսության աջակցության «Կանաչ արահետ» հասարակական կազմակերպությունները՝ 2017թ. դեկտեմբերից Շիրակի մարզի Հայկավան համայնքում մեկնարկեցին «Փոքր ֆերմերային տնտեսությունների կենսապայմանների բարելավում՝ կարողությունների զարգացման և կայուն տնտեսական կառույցների ստեղծման միջոցով» ծրագիրը:
Դեկտեմբերի 25-ը հիշարժան օր էր: Շտապեցինք համայնքի բնակչությանը տեղեկացնել ծրագրի մասին, որին ավելի քան 2 տարի սպասել ենք միասին…
Ծրագրի շահառու Հայկավան գյուղը գտնվում է Շիրակի մարզի արևմուտքում՝ Ախուրյանի ենթաշրջանում: Գյուղն ունի 1598 բնակիչ, 404 տնտեսություն, որից 362-ի հիմնական եկամուտը գյուղատնտեսությունն է:
Ծրագրի ընթացքում, բացի 144 շահառու ֆերմերներին գիտելիքների տրամադրումից ու նրանց կարողությունների զարգացումից, կիրականացվեն նաև որոշակի ներդրումներ՝
- Ծրագրում ներգրավված 19 անապահով ընտանիքների (հիմնական շահառուների) համար կհիմնվի 1.5 հա հատապտուղների, մասնավորապես՝ ազնվամորենու տնկարկներ (հնարավորինս կվերացվի կախվածությունը մոնոկուլտուրաներից):
- Մշակությունը կտարվի լարասյունային համակարգով և կներդրվի (կտեղադրվի) հակակարկտային ցանց՝ բնական աղետների ռիսկը նվազեցնելու նպատակով:
- Ծրագրում ներգրավված 125 շահառուներին ևս կօգնենք զբաղվելու բարձրարժեք գյուղատնտեսությամբ (իրենց տնամերձ հողամասում բարձրարժեք մշակաբույսերի մշակությամբ)՝ տրամադրելով ավանդական և ոչ ավանդական բանջարեղենների, բակլազգիների սերմեր, սածիլներ, պարարտանյութեր:
- Ձեռք կբերվի տրակտոր՝ գութանով, ինչպես նաև հովացնող սարք, որը ծրագրի շահառուների փաթեթավորված արտադրանքը կտեղափոխի Գյումրու և Երևանի մեծածախ և մանրածախ առևտրի կետեր, սուպերմարկետներ:
- Կհիմնվի բերքի հավաքման կետ, պահեստային մաս, փաթեթավորման արտադրամաս և աշխատանքային սենյակ:
- Ծրագրի վերջին տարում արդյունքների վերաբերյալ տեղեկատվությունը կտարածվի նաև հարակից համայնքներում:
- Կհրատարակվեն գյուղատնտեսական ուղեցույցներ և տեղեկատվական նյութեր: Կկազմակերպվեն անհրաժեշտ քանակի ուսուցումներ, դաշտային օրեր, փորձի փոխանակումներ, ինչպես նաև կապահովվի ֆերմերային խմբերի մասնակցությունը մի շարք գյուղատնտեսական համաժողովների և փառատոների:
- Ծրագրի երրորդ տարում կստեղծվի (կկազմավորվի) գյուղատնտեսական կոոպերատիվ և շահառու ֆերմերներից ցանկացողները կարող են դառնալ կոոպերատիվի անդամ:
